2 миллион доллар – һәм син депутат

Русиядә бар нәрсә дә сатыла, шул исәптән, дәүләт органнарындагы җитәкче урыннар да. Ил сәясәтчеләре фикеренчә, бездә нибары биш вазыйфаны гына сатып алу мөмкин түгел икән, болар – президент, премьер-министр һәм тагын берничә ышанычлы зат урыннары. Калган барысы да, шул исәптән, губернатор кәнәфиләре дә акча тора.

Newsru.com сайты хәбәр иткәнчә, дәүләт аппаратындагы урыннар соңгы ун елда 150 мәртәбә кыйммәтләнгән. Владимир Жириновский сүзләренә караганда, бүген губернатор вазыйфасын 5-7 миллион еврога алырга була. Имешләргә ышансаң, Екатеринбург губернаторы Эдуард Россель «иң кыйммәтле»ләрнең берсе икән. Россель шушы урында калуын дәвам итү өчен 2005 елда 15 миллион доллар түләгән диләр. Янәсе, президент администрациясе «старт бәясе»н 10 миллион доллар дип куйган булган.

Әгәр Жириновскийга ышансаң, Федерация Советы рәисе һәм парламент спикеры урыннары да, ким дигәндә, 5 миллион еврога сатыла. Ә депутат мандатлыгы бирә торган партия исемлегенә эләгү өчен 2-5 миллион доллар түләргә кирәк.

Мондый базарның барлыгын бу көннәрдә Мәскәүнең бер судында бара торган процесс та дәлилли. Дүрт кеше, шул исәптән, президент администрациясенең элеккеге әгъзасы, Русиянең дәүләт аппаратында «җылы урыннар» сатып ятуда гаепләнә. Алар үзләренең бер клиентларын – бер шәһәрдә таможня җитәкчесе, ә икенчесен губернатор итәргә теләгәннәр. Суд ябык булганлыктан, әлеге түрәләрнең планнары тормышка ашканмы-юкмы икәне генә мәгълүм түгел.

http://tatyash.ru/